Fimmtudaginn 18. mars síðastliðinn kepptum við í Vesturlandsriðlinum í Skólahreysti. Keppnin var haldin í Smáranum, Kópavogi og að venju var farið með 6 keppendur. Guðmundur Aron Guðmundsson og Elín Gunnarsdóttir kepptu í hreystigreinunum, Tomasz Weyer og María Rún Eyþórsdóttir kepptu í hraðabrautinni og Sveinn Pétur Þorsteinsson og Kristbjörg Fjeldsted fóru með sem varamenn. Krakkarnir stóðu sig ótrúlega vel og náðu besta árangri okkar skóla til þessa. Við lentum í 5. sæti yfir heildina af 11 liðum samtals, en mjög mjótt var á munum milli 3.,4., og 5. sætis.
20 aðrir nemendur fóru með sem áheyrendur á keppnina, ásamt kennara og skólastjóra og munaði um minna fyrir keppendur að hafa þennan stuðning.
Eftir keppnina var svo haldið af stað með keppendur og stuðningsmenn upp í Hafnarfjörð, en Svanur (okkar) Tryggvason hafði látið okkur fá pening og langaði með því að bjóða upp á mat eftir keppnina. Þar fengum við okkur sem sagt pizzahlaðborð sem vakti mikla lukku hjá öllum og kunnum við Svani okkar bestu þakkir fyrir.

Árshátíðir nemenda fóru fram 11. og 15. mars og óhætt er að segja að þær tókust mjög vel. Mikil vinna fer í undirbúning slíkra skemmtana og segja má að allir nemendur og starfsfólk skólans hafi lagt hönd á plóg.
Yngsta stigið setti upp mjög litríka og fjöruga sýningu með atriðum úr Ávaxtakörfunni þar sem allir nemendur úr 1.-4.b tóku þátt.
Miðstigið vann með þemað, norræn goðafræði. Kennarar settu saman þætti þar sem stiklað var á stóru og nemendur leiddu áhorfendur á vit goðanna í Ásgarði og þursanna í Jötunheimum á gamansaman og líflegan hátt.
Unglingastigsnemendur sýndu og sönnuðu hvað þeir búa yfir miklum sköpunarkrafti og hugmyndaauðgi því flest atriðin voru samin og hönnuð af þeim. Sú nýbreytni var hjá unglingastiginu að eftir sýningu fyrir almenning var hátíðarkvöldverður þar sem nemendum var boðið upp á mat fyrir vægt gjald. Sjálfboðaliðar úr foreldrahópnum sáu um að leggja á borð, bera matinn fram og ganga frá á eftir. Hljómsveitin Matti og Draugabanarnir buðu síðan upp á ball á eftir.
Stjórn foreldrafélagsins kom færandi hendi að morgni 16. mars og afhenti nemendum og starfsfólki blómvönd með hamingjuóskum og þökkum fyrir skemmtunina á frábærum sýningum.
Kærar þakkir eru færðar þeim fjölmörgu sem studdu og aðstoðuðu við sýningarnar.