Hin árlega upplestrarkeppni í 7. bekk fór fram í Grundarfjarðarkirkju fimmtudaginn 4. febrúar. Nemendur hafa verið að undirbúa sig í nokkurn tíma undir traustri stjórn og leiðsögn Þorbjargar íslenskukennara.  
Samkoman hófst með því að Sonja Sigurðardóttir lék á píanó verkið Sonatin opus 168 eftir Dia Belli. Nemendurnir lásu gamanmál og síðan lásu þau ljóð að eigin vali. Keppnin fór mjög vel fram og var dómnefnd ekki öfundsverð af hlutverki sínu að velja þrjá bestu lesarana úr þessum góða hópi því allir stóðu sig mjög vel.
Miðurstaðan var sú að í 3. sæti varð Emil Robert Smith, í 2. sæti Mímir Kjartan Ástvaldsson og í 1. sæti Jóhanna Kristín Sigurðardóttir
Dómnefndina skipuðu Gunnar Kristjánsson og Lína Hrönn Þorkelsdóttir.
Skólinn þakkar nemendum 7. bekkjar fyrir góðan lestur og prúðmannlega framkomu og óskar þeim öllum til hamingju með góða frammistöðu. Vinningshöfunum er óskað velgengni í keppninni við jafnaldra sína frá Snæfellsbæ og Stykkishólmi sem fram fer í Grundarfjarðarkirkju miðvikudginn 10. mars kl. 20.